“Së pari komenti im është vetëm ky, personalisht të interesuarit dhe trupa e mbrojtjes nuk ka në dorë vendimin e marrë nga gjykatësja që ka dërguar çështjen për gjykim. Nuk kemi vendimin, ndodh edhe kjo.
Të gjitha të tjerat do të përcaktohen nga konsulta me avokatët që është jashtë kësaj salle”, tha ai. Kështu deklaroi Sali Berisha kur u pyet nëse do të jetë i pranishëm në seancën e parë në themel të gjyqit për dosjen Partizani që do të zhvillohet në 30 Qershor.
Në këtë dosje janë marrë të pandehur pesë persona, mes tyre ish-kryeministri Sali Berisha, dhëndri i tij Jamarbër Malltezi, biznesmeni Fatmir Bektashi, si dhe Andia Pustina dhe Xhimi Begeja.
Më 19 maj, gjyqtarja Flojera Davidhi kaloi këtë dosje për gjykim, duke zyrtarizuar kështu faktin se ish-kryeministri i vendit, Sali Berisha dhe dhëndri i tij, Jamarbër Malltezi, do të përballen në gjyq me akuzat për korrupsion dhe fshehje të pasurisë.
