Një defekt në sistemin e radarit të Qendrës së Kontrollit të Zonës në Milano (ENAV) shkaktoi ndërprerje të mëdha në trafikun ajror në veriperëndim të Italisë. Mbi 300 fluturime u pezulluan ose u devijuan, ndërsa aeroportet kryesore si Malpensa, Linate, Orio al Serio, Torino dhe Xhenova ndaluan përkohësisht nisjet dhe uljet.
Për rreth dy orë, sistemi pësoi ngadalësim në transmetimin e të dhënave, duke detyruar kalimin në sistemin dytësor, i cili sipas rregulloreve evropiane funksionon vetëm me kapacitet të kufizuar (deri në 35%).
Pasi trafiku filloi të rikthehej gradualisht në normalitet rreth orës 22:15, fluturimet u pezulluan sërish për shkak të paqëndrueshmërisë së rrjetit. Ndër avionët e devijuar ishte edhe një fluturim nga Tirana, që në vend të Bergamos, u ul në Bolonjë.
ENAV tha se po punohet për rikthimin e plotë të sistemit, ndërsa autoritetet paralajmëruan se normalizimi i plotë kërkon kohë.
