Kryeministri Edi Rama i është kundërpërgjigjur deputetit britanik Nigel Farage pas deklaratës së tij se “1 në 48 shqiptarë në Britani janë në burg”. Në një postim në “X”, Rama e akuzon Farage për shtrembërim faktesh dhe e fton në Tiranë për të diskutuar me të dhëna të sakta.
Rama thekson se numri i shqiptarëve në Britani është shumë më i lartë se 53 mijë dhe se raporti “1 në 50” është i pavërtetë. Ai nënvizon se shqiptarët nuk duhet të kthehen në viktima të retorikës pas Brexit-it dhe thekson kontributin e tyre në Britani si profesionistë dhe sipërmarrës.
“Kjo nuk është statistikë, është iluzion. Shqiptarët janë pjesë e komunitetit britanik, jo kartë politike,” – u shpreh Rama, duke ironizuar pretendimet e Farage dhe duke vënë theksin te bashkëpunimi mes Shqipërisë dhe Britanisë për luftën kundër emigracionit të paligjshëm.
