Në orët e para të mëngjesit policia serbe ndërhyri për të shpërndarë bllokadat studentore në Beograd dhe në 27 qytete të tjera të vendit. Në disa zona policia përdori forcë për të rivendosur qarkullimin rrugor. Gjithashtu gjatë operacionit u shoqëruan dhjetëra persona.
Studentët deklaruan se nuk do të ndalin protestat dhe bllokadat rrugore, të cilat do të organizohen në mënyrë të paralajmëruar në pika të ndryshme të qyteteve.
Protestat nisën si reagim ndaj arrestimit të tetë studentëve të Fakultetit të Inxhinierisë, të akuzuar se po planifikonin sulme ndaj institucioneve shtetërore dhe bllokim të infrastrukturës.
Presidenti Aleksandar Vuçiç i cilësoi bllokadat si “akte terroriste”. Ai tha se “I shpërndamë grupet e huliganëve shpejt dhe me efikasitet”. Gjithashtu falënderoi Rusinë për mbështetjen, duke shtuar se “Lavrov dhe Putini e dinë se kjo është përpjekje për një revolucion me ngjyra”.
