Komisionierja për Zgjerimin e BE-së, Marta Kos, në një intervistë për Deutsche Welle, tha se mungesa e flamujve evropianë në protestat në Serbi reflekton një mosbesim të thellë ndaj BE-së.
Sipas saj, qytetarët serbë ndihen të zhgënjyer për shkak të mbështetjes së perceptuar ndaj Vuçiqit, kujtimeve të bombardimeve të NATO-s, çështjes së Kosovës dhe frikës nga përplasja me Rusinë.
Kos theksoi se protestat shprehin kërkesa që përputhen me prioritetet e BE-së: sundim të ligjit, liri të medias dhe luftë kundër korrupsionit. Ajo bëri thirrje për përmirësim të komunikimit dhe theksoi se Serbia duhet të përmbushë reformat dhe të zgjidhë çështjen e Kosovës nëse dëshiron anëtarësim.
Sa i përket Ukrainës dhe Moldavisë, Kos vlerësoi progresin e tyre drejt BE-së, pavarësisht presionit rus, dhe tha se procesi i zgjerimit do të vazhdojë mbi bazën e meritës, pavarësisht sfidave të brendshme si qëndrimi i Hungarisë.
