Pas gjashtë ditësh përpjekjesh për shuarjen e flakëve, zjarri në landfillin e Elbasanit është neutralizuar. Kryetari i Bashkisë, Gledian Llatja, tha se situata po stabilizohet dhe po normalizohet edhe transporti i mbetjeve në impiant, që ishte bllokuar për shkak të flakëve.
Ministrat e Mbrojtjes dhe të Brendshëm, Pirro Vengu dhe Ervin Hoxha, vizituan terrenin për të ndjekur nga afër situatën dhe për të bërë publike rezultatet e matjeve të ndotjes së ajrit. Sipas tyre, ndotja ishte e kufizuar dhe nuk ka pasur shqetësime në zonat urbane përreth.
“Gazrat kryesorë të pranishëm kanë qenë të përqendruar në vendngjarje, sidomos dioksidi i karbonit. Masat për personelin u morën menjëherë,” u shpreh ministri Vengu. Ai shtoi se do të ndërmerren masa parandaluese, përfshirë monitorimin me kamera dhe forcimin e reagimit emergjent.
