Në 30-vjetorin e masakrës së Srebrenicës, ish-ministri i Jashtëm Ditmir Bushati e ka cilësuar këtë ngjarje si një nga krimet më të rënda të historisë moderne europiane. Në një postim në rrjetet sociale, ai theksoi rëndësinë e ruajtjes së kujtesës historike dhe dënoi qëndrimin e paqëndrueshëm të Serbisë ndaj kësaj tragjedie.
Bushati kritikoi presidentin serb Aleksandar Vučić për, siç tha ai, përdorimin politik të Srebrenicës: “Në 2015 u paraqit si europianist, por më pas u rikthye te retorika nacionaliste dhe udhëhoqi përpjekjet për të bllokuar rezolutën e OKB-së për njohjen e gjenocidit.”
Ai përshëndeti miratimin më 23 maj 2024 nga Asambleja e Përgjithshme e OKB-së të rezolutës që shpall 11 korrikun si Ditën Ndërkombëtare të Përkujtimit të Gjenocidit në Srebrenicë, një nismë e mbështetur edhe nga Shqipëria.
Duke iu referuar përvojës së shqiptarëve gjatë viteve ’90, Bushati tha se drejtësia për viktimat boshnjake është një çështje e rëndësishme edhe për shqiptarët. Ai gjithashtu theksoi nevojën për një qasje të drejtë dhe të balancuar ndaj vuajtjeve në konflikte të tjera si në Ukrainë dhe Gaza.
