Në datë 23 Korrik Gjykata e Apelit të Posaçëm do të vendosë mbi kërkesën e Alqi Bllakos, ish-deputetit socialist që është arrestuar për inceneratorët. Bllako ka ankimuar vendimin e Shkallës së Parë për dënimin e tij me 4 vite burg lidhur me inceneratorin e Tiranës.
Ish-deputeti kërkon pafajësi me argumentin se posti i tij nuk futet tek zyrtarët e lartë dhe nuk mund të ngrihet akuza në atë formë. Gjykata e vlerësoi si funksionar të lartë pasi në postin si Sekretar i Përgjithshëm ka përcjellë shkresa.
Bllako u dënua nga Gjykata e Posaçme Antikorrupsion në 11 mars të këtij viti me 4 vite burg, dënim i cili u zbrit në 2 vite e 8 muaj për shkak të procedurës së gjykimit të shkurtuar, pasi u gjet fajtor për kryerjen e veprës penale “korrupsion pasiv” në dy raste.
Ish-deputeti është dënuar më herët me vendim të formës së prerë edhe për inceneratorin e Elbasanit me 2 vite e 8 muaj burg, ndërsa për inceneratorin e Fierit çështja është rikthyer për rigjykim.
