Presidenti amerikan Donald Trump ka deklaruar se Shtetet e Bashkuara janë shumë pranë arritjes së një marrëveshjeje tregtare me Indinë, duke theksuar gjithashtu se një marrëveshje e ngjashme mund të arrihet me Bashkimin Evropian së shpejti.
Në një intervistë për Real America’s Voice, Trump theksoi se administrata e tij është duke negociuar kushte të favorshme për SHBA-në, me synimin për uljen e deficitit tregtar.
Ai tha se Bashkimi Evropian, pas një periudhe të ashpër, tani ka filluar të tregojë vullnet për bashkëpunim.
“Ne jemi shumë afër me Indinë dhe mund të arrijmë një marrëveshje me BE-në,” deklaroi Trump.
Po ashtu, ai komentoi edhe mundësinë për një marrëveshje me Kanadanë dhe për një tarifë të mundshme për vendet më të vogla, duke shtuar se është ende herët për të folur për këtë.
Negociatat e reja me Indinë po zhvillohen në një moment kur SHBA ka shpallur tarifa të reja, ndërsa po diskutohet gjithashtu për çështje të tjera tarifore.
