Zëdhënësja e Partisë së Lirisë, Jasmira Memelli në një deklaratë për mediat u shpreh se Shqipëria renditet zyrtarisht si vendi i katërt më i shtrenjtë në Europë për çmimet e bulmetit.
Ajo u shpreh se sipas Eurostat produktet bazë si qumështi, djathi dhe veza kushtojnë 131.5% të mesatares së Bashkimit Europian, më shumë se në Greqi, Bullgari, Kosovë apo çdo vend tjetër të rajonit. Gjithashtu u shpreh se Shqipëria është një vend që qeveria e ka kthyer në treg për importet.
“Sot, Shqipëria nuk është më vetëm një vend që nuk prodhon dot për veten, por është një vend që qeveria e ka kthyer në treg për importet, në dëm të prodhuesit shqiptar dhe përfitim të klientelës së saj.
Fshati po shuhet. Fermerët po falimentojnë. Të rinjtë po largohen dhe shqiptarët paguajnë çmime europiane për produkte që duhet t’i kishin me bollëk dhe me kosto minimale.
Ky është krim ekonomik me pasoja sociale të rënda, dhe kjo qeveri është drejtpërdrejt përgjegjëse. Jo vetëm për çmimet e larta, por për shkatërrimin sistematik të një sektori që mban në këmbë gjysmën e vendit.
Partia e Lirisë kërkon rikthimin e skemës së TVSH-së së rimbursueshme për përpunuesit dhe prodhuesit; Subvencione të drejtpërdrejta për fermerët, si në çdo vend të qytetëruar;
Fonde dhe kredi me interesa të ulëta për bujqësinë, me garanci shtetërore;
Një politikë të re kombëtare për mbrojtjen e prodhimit vendas, ndryshe Shqipëria do të kthehet përfundimisht në një vend që vetëm konsumon dhe nuk prodhon.
Mjaft me mashtrime, tallje dhe propagandë. Qeveria duhet të veprojë menjëherë. Ky është një akt tradhtie ndaj interesit publik dhe ne nuk do të heshtim përballë tij.
Partia e Lirisë ka një program të qartë dhe mëse të realizueshëm, 5 prioritete për katër milionë shqiptarë plus, ku fokus të vecantë ka zhvillimi I bujqësisë dhe shndërimi I Shqipërisë në një fuqi prodhuese dhe eksportuese në rajon, pasi ne besojmë së Shqipëria ka potencialin të jetë.”, u shpreh ajo.
