Presidenti i Ukrainës, Volodymyr Zelensky, theksoi se Evropa duhet të jetë pjesë e negociatave për të zgjidhur konfliktin me Rusinë, duke e konsideruar Ukrainën pjesë të pandashme të kontinentit evropian.
Kjo deklaratë erdhi pas lajmeve se Donald Trump dhe Vladimir Putin pritet të kenë një takim në ditët në vijim.
Në një postim në rrjetet sociale, Zelensky nënvizoi se lufta po zhvillohet në tokën evropiane dhe prandaj kontinentit i takon të jetë i përfshirë në procesin e paqes, për të ndihmuar në përfundimin e konfliktit që vazhdon prej vitit 2022.
Gjithashtu, kancelari gjerman Friedrich Merz bisedoi me presidentin ukrainas, duke theksuar angazhimin e Gjermanisë për të mbështetur Ukrainën dhe duke vënë në dukje bashkëpunimin me SHBA-në dhe aleatët evropianë për të adresuar situatën në rajon.
