Kreu i Partisë Mundësia, Agron Shehaj me anë të një video në rrjetin e tij social ka reaguar pas mbylljes së sinjalit të News24. Shehaj e ka cilësuar këtë si një akt për të frikësuar të gjitha mediat e vendit.
“Nëse përcjell propagandën e pushtetit, përfiton tendera, koncesione, privilegje. Nëse jo, pushteti të shuan,” thotë Shehaj.
Ai shtoi se “Mbyllja e News24 është një akt për t’u thënë të gjitha mediave: O nënshtroheni, o shuheni! Sot është News24, nesër mund të jetë kushdo.”
Shehaj thotë se mbyllja e Agon Channel, Ora News dhe më pas News 24 duhet që të shqetësojë çdo qytetar që dëshiron që të jetojë në një vend demokratik.
“Një për ortakët e Ramës, që marrin mbështetje, tendera e prona publike. Një tjetër për ata që kërkojnë të jenë të lirë dhe t’i shërbejnë qytetarëve. Nëse je media që përcjell mesazhin e zyrës së propagandës së Edi Ramës, përfiton privilegje. Por nëse nuk e lejon pushtetin të të kontrollojë, ai gjen mënyrën të të mbyllë gojën” , thotë Shehaj.
