Rusia e ka fituar luftën në Ukrainë, tha të martën kryeministri hungarez i krahut të djathtë Viktor Orban përpara një samiti midis Presidentit të SHBA-së Donald Trump dhe homologut të tij rus Vladimir Putin të premten.
Në pushtet që nga viti 2010, Orban është kritikuar nga disa udhëheqës evropianë për lidhjet e qeverisë së tij me Rusinë dhe kundërshtimin ndaj ndihmës ushtarake për Ukrainën, ndërsa kabineti i tij po përpiqet të ringjallë ekonominë nga një tronditje inflacioniste.
Orban, i cili ka mbajtur lidhje të ngushta me Putinin edhe pas pushtimit të Ukrainës nga Rusia në shkurt 2022, u bë i vetmi udhëheqës i Bashkimit Evropian të hënën që nuk mbështeti një deklaratë të përbashkët duke thënë se Ukraina suhet të ketë lirinë për të vendosur të ardhmen e saj.
“Po flasim tani sikur kjo të ishte një situatë lufte pa fund, por nuk është e tillë. Ukrainasit e kanë humbur luftën.
Rusia e ka fituar këtë luftë”, tha Orban në një intervistë për kanalin e YouTube-it ‘Patriot’.
“Pyetja e vetme është se kur dhe në çfarë rrethanash Perëndimi, i cili qëndron pas ukrainasve, do ta pranojë se kjo ka ndodhur dhe çfarë do të rezultojë nga e gjithë kjo.”
Hungaria, e cila merr pjesën më të madhe të energjisë nga Rusia, ka refuzuar të dërgojë armë në Ukrainë, me Orbanin që gjithashtu kundërshton fuqimisht anëtarësimin e Ukrainës në BE, duke thënë se kjo do të shkaktonte kaos tek fermerët hungarezë dhe në ekonominë e gjerë.
Orban tha se Evropa kishte humbur një mundësi për të negociuar me Putinin nën administratën e ish-presidentit amerikan Joe Biden dhe tani ishte në rrezik që e ardhmja e saj të vendosej pa përfshirjen e saj.
“Nëse nuk je në tryezën e negociatave, je në menu”, tha Orban, duke shtuar se ai pjesërisht e kundërshtoi deklaratën e përbashkët të BE-së mbi Ukrainën, pasi e bënte Evropën të dukej “qesharake dhe patetike”.
“Kur dy udhëheqës ulen për të negociuar me njëri-tjetrin, amerikanët dhe rusët… dhe ti nuk je i ftuar atje, nuk nxitohesh për në telefon, nuk vrapon përreth, nuk bërtet nga jashtë.”/ Reuters.
