Burime të sigurisë ndërkombëtare raportojnë se Rusia mund të jetë në prag të një testimi të ri për raketën e saj me energji bërthamore 9M730 Burevestnik, në një moment kur Presidenti Vladimir Putin pritet të zhvillojë bisedime të rëndësishme me Presidentin amerikan Donald Trump mbi krizën në Ukrainë.
Dy studiues të njohur amerikanë, Jeffrey Lewis nga Instituti Middlebury dhe Decker Eveleth nga organizata kërkimore CNA, kanë analizuar pamje satelitore nga baza ruse e testimeve në Pankovo, një zonë e izoluar në arkipelagun Novaya Zemlya, në veri të Rusisë.
Sipas tyre, aty është vërejtur aktivitet i shtuar – përfshirë lëvizje personeli, pajisjesh, avionësh dhe anijesh – të ngjashme me ato që janë parë para testimeve të mëparshme të kësaj rakete.
Sipas vlerësimeve, ky zhvillim mund të lidhet me përpjekjet e Moskës për të forcuar qëndrimin e saj strategjik përpara një takimi të ndjeshëm diplomatik, ndërsa konflikti në Ukrainë vijon të mbetet në qendër të vëmendjes ndërkombëtare.
