Presidentja e Kosovës, Vjosa Osmani, ka reaguar pas konstituimit të Kuvendit të Kosovës, duke e cilësuar këtë zhvillim si një hap të rëndësishëm drejt rikthimit të funksionalitetit institucional dhe demokratik në vend.
Në një deklaratë për media, Osmani shprehu mbështetjen për ecurinë e procesit, duke theksuar rëndësinë që ai të përmbyllet sa më shpejt dhe në përputhje të plotë me Kushtetutën e Republikës së Kosovës dhe normat demokratike.
Presidentja uroi kryetarin e ri të Kuvendit, Dimal Basha, si dhe nënkryetarët e sapozgjedhur: Albulena Haxhiu, Vlora Çitaku, Kujtim Shala dhe Emilija Rexhepi.
Ajo theksoi se pret nga udhëheqja e re e Kuvendit angazhim maksimal në interes të qytetarëve dhe forcimit të institucioneve demokratike.
Osmani gjithashtu bëri thirrje që Kuvendi të vazhdojë me hapat e ardhshëm kushtetues, duke përfshirë edhe votimin e Qeverisë së re të dalë nga zgjedhjet parlamentare të 9 shkurtit.
