Pasditen e djeshme një turist ka humbur jetën pasi ra në një humnerë në shtegun malor mes Thethit dhe Valbonës, në zonën e Qafës së Valbonës.
Sipas raportimeve paraprake, viktima ishte pjesë e një grupi turistësh që po udhëtonin pa guidë të organizuar.
Menjëherë në vendin e ngjarjes sipas Artur Gunit, President i Federates Shqiptare te Alpinizmit dhe Turizmit Malor mbërritën edhe specialistët e njësive të shpëtimit malor nga Shqipëria dhe Kosova, si pjesë e një bashkëpunimi rajonal për ndërhyrje emergjente në zonat e thella malore.
Në orët e para të mëngjesit të sotëm, pas një përpjekjeje të gjatë dhe të rrezikshme u bë e mundur nxjerrja e trupit të pajetë nga humnera ku kishte rënë turisti.
