Kreu i Partisë Demokratike, Sali Berisha, ka reaguar ndaj urimit të BE-së për qeverinë e re “Rama 4”, duke e cilësuar këtë si një akt të zakonshëm dhe duke theksuar se rezolutat e partive të djathta evropiane mbeten në fuqi.
Sipas Berishës, farsa elektorale e 11 majit, të cilën ai e ka quajtur të dënuar nga forcat politike të qendrës së djathtë, nuk do të pranohet kurrë nga PD-ja. Ai shtoi se Ambasadori i BE-së në Tiranë përfaqëson vetëm Bashkimin Evropian, jo interesat e partive politike.
“Rezolutat nuk bien asnjëra. Ambasadori i BE-së nuk përfaqëson në detyrën e tij, organizatat e partive politike. Ai përfaqëson BE-në. Pra këtu nuk ka asnjë lloj ngjarje të paqartë. Rezolutat përkundrazi janë në fuqi dhe do jenë, e ju garantoj ju se farsa elektoral e Edi Ramës e dënuar tashmë nga të gjitha rezolutat ndërkombëtare të forcave politike të qendrës së djathtë dhe të djathtë, nuk do pranohet kurrë nga PD-ja.”, tha Berisha.
