Në Dhomat e Specializuara në Hagë, sot vijon procesi gjyqësor ndaj ish-presidentit Hashim Thaçi, me dëshminë e një shtetasi britanik dëshmitari i tretë i propozuar nga ekipi i mbrojtjes.
Kjo dëshmi vjen pas atyre të James Rubin dhe Paul Williams javën e kaluar, të cilët mbështetën qëndrimet e mbrojtjes.
Rubin, ish-ndihmës sekretar amerikan i shtetit, deklaroi se “Thaçi nuk kishte autoritet për të vendosur për veprimet e UÇK-së” dhe i cilësoi akuzat ndaj tij si të pabazuara. Ndërkohë, Paul Williams, ish-këshilltar ligjor në Rambuje, konfirmoi se Thaçi përfaqësonte delegacionin kosovar, por nuk drejtonte organizatën ushtarake.
Seanca e sotme nis në orën 09:00, ndërsa mbrojtja ka paralajmëruar edhe 8 dëshmitarë të tjerë. Përfundimi i paraqitjes së mbrojtjes pritet më 14 nëntor, ndërsa deklaratat përfundimtare janë planifikuar për më 22 dhjetor 2025.
