Një sondazh i fundit nga Survation tregon se shumica e anëtarëve të Partisë Laburiste në Mbretërinë e Bashkuar janë të pakënaqur me udhëheqjen e Keir Starmer dhe kërkojnë një drejtim të ri para zgjedhjeve të ardhshme.
Sipas të dhënave, të publikuara në emisionin “Sunday Morning” në Sky News, 53% e të anketuarve duan që Starmer të largohet nga posti i liderit të partisë përpara zgjedhjeve, ndërsa vetëm 31% preferojnë që ai të vazhdojë të qëndrojë në krye.
Anketa, e zhvilluar në fund të shtatorit me pjesëmarrjen e 1.254 anëtarëve, tregon gjithashtu se 65% mendojnë se drejtimi i Starmer po e çon partinë në rrugën e gabuar.
Presioni ndaj liderit laburist vjen në një kohë kur partia po përballet me rritjen e mbështetjes për Reform UK, lëvizja populiste e udhëhequr nga Nigel Farage. Në një mesazh të drejtpërdrejtë për anëtarët e partisë, Starmer u bëri thirrje për unitet dhe ndaljen e përçarjeve të brendshme.
“Jemi përballë betejës më të madhe politike të jetës sonë,” tha ai për BBC News. “Tani është koha për bashkim kundër ekstremizmit të Reform UK.”
