Ministri gjerman i Mbrojtjes, Boris Pistorius, deklaroi se Gjermania është e përkushtuar të mbrojë rajonin e Baltikut përballë kërcënimeve nga Rusia, të cilën e cilësoi si rrezikun më të madh dhe të menjëhershëm për NATO-n.
Duke folur në Lituani, gjatë inaugurimit të një baze të përhershme logjistike në Rukla, Pistorius tha se Berlini do të veprojë me përgjegjësi dhe në unitet me aleatët. Ai njoftoi gjithashtu se deri në mesin e vitit 2026, rreth 2,000 trupa gjermane do të dislokohen në Lituani, si pjesë e përpjekjeve për forcimin e parandalimit ndaj agresionit rus.
