Kombëtarja shqiptare do të rikthehet në fushë për dy sfida të rëndësishme: ndeshjen kualifikuese të Kupës së Botës 2026 ndaj Serbisë dhe një miqësore ndaj Jordanisë.
Grumbullimi zyrtar fillon më 6 tetor, ndërsa trajneri Sylvinho do të shpallë listën e lojtarëve këtë të premte, më 3 tetor. Në të njëjtën ditë, në orën 11:00, do të mbahet konferenca për shtyp në “Shtëpinë e Futbollit”.
Ndeshja Serbi – Shqipëri do të luhet më 11 tetor në Leskovac, në orën 20:45, pa praninë e tifozëve shqiptarë në stadium, sipas marrëveshjes dypalëshe. Miqësorja ndaj Jordanisë është programuar më 14 tetor në stadiumin “Air Albania”, në orën 19:00.
