Një tjetër shqiptar është viktimë e dhunës në Amerikën Latine. Artur Tushi, 44 vjeç, u ekzekutua me armë zjarri në qytetin Medellín të Kolumbisë, në një atentat që dyshohet të jetë i lidhur me krimin e organizuar.
Ngjarja ndodhi pasditen e së dielës në zonën El Poblado, pranë një qendre tregtare të njohur. Tushi ndodhej në shoqërinë e një gruaje, e cila mbeti e plagosur gjatë të shtënave dhe është nën kujdesin e mjekëve.
Autori i dyshuar, venezuelian, është arrestuar nga policia kolumbiane në komunën Bello, në veri të Luginës së Aburrá-s. Gjatë aksionit janë sekuestruar arma e krimit dhe motoçikleta që u përdor për t’u larguar nga vendi i ngjarjes.
Sipas të përditshmes El Colombiano, Tushi mbante dokumente ekuadoriane dhe dyshohet se ishte i përfshirë në trafikun e lëndëve narkotike, çka shton dyshimet se bëhet fjalë për një larje hesapesh brenda rrjeteve kriminale të drogës.
