Në seancën e Komisionit për Çështjet Ligjore dhe Administratën Publike, Inspektorati i Lartë i Drejtësisë (ILD), Këshilli i Lartë Gjyqësor, Këshilli i Lartë i Prokurorisë dhe Inspektorati i Lartë i Deklarimit dhe Kontrollit të Pasurive dhe Konfliktit të Interesave raportuan mbi veprimtarinë e tyre për vitin 2024.
Kreu i ILD-së, Artur Metani, gjatë fjalës së tij falënderoi Kuvendin për aktin solemn të mbajtjes së një minute heshtje në nderim të gjyqtarit Astrit Kalaja, duke theksuar rëndësinë e solidaritetit institucional dhe njerëzor.
Metani vuri në dukje sfidat në gjetjen e kufijve mes shprehjes së pakënaqësive ndaj sistemit dhe reagimeve ekstreme ndaj punës së gjyqtarëve dhe prokurorëve. “Gjetja e kufijve të duhur për të ndarë problemet reale nga reagimet ekstreme është shumë e vështirë,” tha ai.
