Seanca e sotme plenare në Kuvend, pas raportimit të kreut të SPAK, Altin Dumani, u shoqërua me debate të forta politike. Kryetari i Partisë Demokratike, Sali Berisha, sulmoi ashpër drejtuesin e Prokurorisë së Posaçme, duke e akuzuar se po mbron qeverinë në hetimet për aferat korruptive.
“Ishte një rast unik për qytetarët që panë grupin e mëkatarëve të përulur deri në dhe, që mbronin një sistem që penalizon qytetarin e thjeshtë. Ju, avokatët e Dumanit, të kapurit peng të Edi Ramës, harroni se shqiptarët kanë humbur 630 milionë euro me marrëveshjen e CEZ, që Dumani dhe të tijtë e mbulojnë.”
Gjatë fjalimit, ai përmendi edhe disa projekte të mëdha publike, si tuneli i Llogarasë dhe aeroporti i Vlorës, duke pretenduar se aty janë zhdukur dhjetëra miliona euro. Berisha akuzoi hapur zv/kryeministren Belinda Balluku, duke thënë se “Lubia” kërkon të marrë në kontroll edhe aeroportin.
