Konferenca e Kryetarëve, e thirrur sot nga kryeparlamentari Niko Peleshi, është shoqëruar me debate të ashpra mes mazhorancës dhe opozitës, teksa në rend të ditës ishte miratimi i kalendarit për shqyrtimin e projektbuxhetit të vitit 2026.
“Mollë sherri” u bë mënyra e procedimit me buxhetin, pasi socialistët kërkuan që ai të kalonte menjëherë për diskutim, ndërsa opozita kundërshtoi duke theksuar se buxheti nuk mund të shqyrtohet pa u paraqitur njëkohësisht edhe paketa fiskale.
Deputetët demokratë, mes tyre Jorida Tabaku dhe Gazment Bardhi, e cilësuan këtë veprim si shkelje të ligjit dhe të Kushtetutës, ndërsa përfaqësuesit e mazhorancës, përfshirë Taulant Ballën, kërkuan të mos zvarritet procesi me argumentin se qytetarët presin miratimin e buxhetit.
“Nuk mund të diskutojmë për një projektbuxhet pa pasur edhe paketën fiskale në dorë. Ju e dini shumë mirë këtë. Nuk mund të kalojë buxheti dhe pastaj të diskutohet paketa fiskale, nuk ka buxhet pa paketë fiskale, është e qartë. Kemi pasur edhe debate të gjata për këtë. Deshëm ta çonim edhe në Kushtetuese para tre vitesh dhe kryeparlamentarja Nikolla ndërhyri dhe kërkoi që të vinte paketa fiskale në Kuvend. Nuk ka ndodhur ndonjëherë që projektbuxheti të paraqitet pa një paketë fiskale. Është një standard që nuk e shkelim dot. Çfarë do miratojmë ne këtu kur nuk kemi një paketë fiskale,” tha Jorida Tabaku, gjatë debatit në Konferencën e Kryetarëve.
