Gjykata e Posaçme ka vendosur arrest me burg për policin e Antiterrorit, Igli Haxhiaj, i përfshirë në hetimet e SPAK për një grup kriminal shqiptar të trafikut të drogës nga Amerika Latine dhe Shqipëria drejt Italisë.
Seanca u zhvillua me dyer të mbyllura, ndërsa Haxhiaj u arrestua pas konfirmimit të vendimit të arrestit të dhënë më parë në mungesë.
Hetimet zbuluan se oficeri kishte nxjerrë sekrete hetimore dhe ishte korruptuar nga anëtarë të grupit kriminal, duke vepruar në shërbim të tyre.
Ai dyshohet për veprat penale të nxjerrjes së sekretit hetimor, korrupsionit dhe shpërdorimit të detyrës.
Operacioni i përbashkët mes SPAK dhe prokurorisë italiane në Breshia goditi bazat e mafies shqiptare në Rovato dhe Palazzolo.
Gjatë aksionit janë arrestuar 8 persona, ndërsa gjithsej 49 janë marrë nën hetim, shumica shqiptarë.
Nga operacionet e paligjshme u sekuestruan afërsisht 3 milionë euro, ndërsa fitimet e drogës kapin rreth 12 milionë euro.
