Deputeti i Partisë Demokratike, Ervin Salianji, ka folur për mediat përpara nisjes së mbledhjes së Kryesisë së PD-së, ku u shpreh në mbështetje të protestave si forma kryesore e reagimit ndaj qeverisë.
Salianji theksoi se opozita duhet të përqendrohet te mobilizimi qytetar dhe te kthimi i pakënaqësive të demokratëve në energji politike. Sipas tij, pa këtë përfshirje aktive, organizimi i protestave do të mbetet i vështirë.
“Është momenti që të fokusohemi tek protesta, tek revolta dhe përballja me qeverinë. Duhet të dëgjojmë çdo shqetësim qytetar dhe, nëse nuk jemi të aftë t’i përkthejmë këto shqetësime në energji, do ta kemi të vështirë të organizojmë protesta,” u shpreh Salianji.
