Deputetja e Partisë Demokratike, Jorida Tabaku, ka reaguar ndaj raportit të Barometrit të Ballkanit Perëndimor 2025, duke e cilësuar situatën e korrupsionit në Shqipëri si alarmante.
Ajo theksoi se mbi 50% e bizneseve në vend janë të detyruara të paguajnë ryshfet për të kryer procedura administrative, duke akuzuar qeverinë për një sistem të ngritur dhe të institucionalizuar korrupsioni që dëmton funksionimin e shtetit dhe ekonomisë.
“Në Shqipëri, korrupsioni është kthyer në një ‘taksa’ të institucionalizuar që e mbështet pushtetin dhe i varfëron qytetarët dhe bizneset. Mbi 50% e bizneseve deklarojnë se paguajnë për të përfunduar një procedurë, që sot është bërë praktikë e përditshme në administratën shqiptare,” tha Tabaku, duke theksuar se korrupsioni është përhapur në të gjitha nivelet, nga shërbimet e pretenduara online, tek tenderët, koncesionet dhe doganat.
“Ajo që ndodh sot është se bizneset nuk ndëshkohen nga tregu, por nga një sistem korrupsioni që e kontrollon të gjithë procesin, dhe që favorizon një pakicë të ngushtë. Po ndodhin largime masive të të rinjve, rritje të çmimeve dhe shtim të barrës fiskale. Kjo është pasoja direkte e korrupsionit që është bërë pjesë integrale e jetës institucionale në Shqipëri,” vijoi Tabaku.
