Parlamenti Evropian të mërkurën ka miratuar një raport lidhur me strategjinë e zgjerimit të Bashkimit Evropian. Eurodeputetët kanë thënë se zgjerimi është një përgjigje strategjike ndaj realitetit gjeopolitik në zhvillim dhe një investim jetik për sigurinë dhe stabilitetin e Bashkimit Evropian.
Parlamenti argumentoi se kostoja e moszgjerimit do të ishte më e madhe se ajo e pranimit të anëtarëve të rinj në BE, “pasi kjo do të rrezikonte krijimin e zonave gjeopolitike gri të cenueshme nga ndikimi i huaj armiqësor”.
Në raport përfshihet edhe Kosova në prioritetet strategjike të zgjerimit të BE-së. Aty theksohet rëndësia e dialogut Prishtinë-Beograd për avancimit drejt anëtarësimit.
“Nënvizon rëndësinë e dialogut Beograd–Prishtinë, i cili është thelbësor që Serbia dhe Kosova të përparojnë në rrugët e tyre drejt Evropës dhe që do të kontribuojë në stabilitetin dhe prosperitetin rajonal”, thuhet në raport.
Po ashtu, Parlamenti thekson se Shqipëria dhe Mali i Zi tashmë kanë vendosur objektiva ambicioze për të përfunduar negociatat e tyre të anëtarësimit deri në fund të viteve 2026 dhe 2027.
Në raport thuhet se BE-ja duhet t’i inkurajojë këto vende kur ambicia e tyre përputhet me reforma konkrete, ndërsa eurodeputetët i kanë bërë thirrje Këshillit të Evropës të njohë këtë moment pozitiv dhe të heqë çdo pengesë që mund të ekzistojë nga ana e BE-së.
Eurodeputetët theksuan tutje se anëtarësimi duhet të mbetet i bazuar në meritë dhe se asnjë vend nuk duhet të trajtohet si pjesë e një pakoje.
Raporti thekson se përputhja me politikën e përbashkët të jashtme dhe të sigurisë të BE-së është parakusht kyç i shteteve kandidate për anëtarësim në BE./ KOHA
