Lëvizja Bashkë ka protestuar këtë mëngjes para Bashkisë së Durrësit për përmbytjet që kanë prekur disa zona të qytetit në ditët e fundit.
Protestuesit kërkuan shpalljen e gjendjes së jashtëzakonshme dhe hetim të thelluar për hidrovorin e dytë, si dhe për punonjësin e bashkisë, Astrit Hysenaj, që dyshohet se humbi jetën pas përmbytjes.
Pankartat e protestuesve lexonin: “Gjendje e jashtëzakonshme tani”, “Uji na mbyt, korrupsioni sundon”, dhe “Hetim për portin e ri”.
Një ditë më parë, Prokuroria e Durrësit nisi hetime për veprat penale të shpërdorimit të detyrës, shkatërrimit të pronës me përmbytje dhe pakujdesisë, duke dyshuar për mosfunksionimin e hidrovorit që ka kushtuar 19 milionë euro.
