Komisioni Qendror i Zgjedhjeve (KQZ) do të shpallë nesër, më 31 janar, rezultatet përfundimtare të zgjedhjeve të parakohshme për Kuvendin e Kosovës, të mbajtura më 28 dhjetor 2025. Procesi i rinumërimit të 2,557 vendvotimeve ka përfunduar, dhe mbeten për t’u rinumëruar vetëm disa vota.
Sipas KQZ-së, pas rinumërimit dhe verifikimit të të dhënave, do të procedohet me certifikimin e rezultateve përfundimtare. Ndërkohë, hetimet për manipulim të votave në disa komuna vazhdojnë, duke përfshirë intervistimin e dhjetëra personave dhe ndalimin e disa komisionarëve dhe vëzhguesve.
Për shkak të këtyre parregullsive, KQZ vendosi rinumërimin e votave për kandidatët, ndërsa ato për subjektet politike mbetën të pandryshuara. Votat e manipuluara kanë çuar në ndryshimin e deputetit Fikrim Damka, i cili është zëvendësuar nga Ergul Mazrek.
