Presidenti i Federatës Shqiptare të Futbollit, Armand Duka, ka komentuar shortin e zhvilluar për UEFA Nations League, ku Shqipëria është futur në Grupin C1, përballë rivalëve si Finlanda, Bjellorusia dhe San Marino. Ai theksoi se ndeshjet fitohet në fushë dhe se përqendrimi kryesor i ekipit mbetet te ndeshjet e play-off-it për kualifikimin në Kupën e Botës 2026.
“Në përgjithësi, unë nuk është se kam menduar ndonjëherë që ndeshjet fitohen në short apo në letër. Ndeshjet dhe kompeticionet fitohen në fushë. Ka shpeshherë raste që mendon se shorti ishte i keq dhe në përfundim të aktivitetit renditesh më mirë dhe anasjelltas. Gjithmonë ka një lloj baraspeshe sportive të skuadrave, sepse ndahen në vazo siç dihen rregullat. Nuk mund të them nëse ishim me fat apo pa fat. Mund të them për një gjë që ishim me fat që nuk kemi ndonjë skuadër që do të udhëtojmë shumë larg. Në Finlandë uroj që të mos luajmë në nëntor, sepse ka goxha temperatura të ulëta dhe nuk është mirë për futbollistët. Gjithsesi është një kompeticion që kemi kohë për ta përgatitur. Jam shumë i sigurt që do ta përgatisim dhe luajmë mirë.”
