Kremlini ka akuzuar liderët evropianë, përfshirë kancelarin gjerman, Friedrich Merz, dhe presidentin francez, Emmanuel Macron, për mosbërjen e përpjekjeve për të kontaktuar presidentin rus, Vladimir Putin. Zëdhënësi i Kremlinit, Dmitry Peskov, tha se Merz dhe Macron nuk kanë tentuar të telefonojnë Putinin, dhe se një thirrje e thjeshtë mund të riniste dialogun.
Peskov theksoi se Putin ka qenë gjithmonë i hapur për komunikim, madje edhe përballë tensioneve serioze, duke e parë dialogun si mënyrën e vetme për të zgjidhur problemet. Ai shtoi se Putin nuk ka refuzuar kurrë të komunikojë dhe ka shprehur preferencën për bisedime edhe në kohë konflikti.
Presidenti francez, Emmanuel Macron, kishte shprehur disa ditë më parë dëshirën për të rifilluar dialogun me presidentin rus, duke dërguar një këshilltar të lartë në Moskë, një takim ky që shënoi përpjekjen e parë për komunikim pas nisjes së agresionit rus ndaj Ukrainës. Nga ana tjetër, Merz ka deklaruar se Europa duhet të koordinohet para se të vendosë një komunikim të drejtpërdrejtë me Rusinë.
