Kryeministri Edi Rama u shpreh me tone të ashpra në mbledhjen e sotme të grupit parlamentar duke deklaruar se prokurorët dhe gjyqtarët janë dehur nga pavarësia dhe kanë lajthitur duke ecur me logjikën ‘mbylle gojën se të futa brenda’.
“Ne e besojmë që kur kushtetuta demokratike e Republikës së Shqipërisë, thuhet se ka 3 pushtete të pavarura dhe nuk mund të jenë në letër siç ishin para, kjo parti, i hyri detit në këmbë dhe pas 100 e kusur vitesh shtet shqiptar, ne i dhamë pavarësinë reale pushtetit gjyqësor, prandaj dhe unë që e kam udhëhequr partinë në rrugën e përpjetë për pavarësimit e gjyqësorit, nuk bëhem kurrë pishman pavarësisht bombave artizanale që kurdisen nga lloj-lloj prokurorësh e gjykatësish, lart e poshtë nëpër Shqipëri, të cilët shija e pavarësisë reale i deh, u mjegullon arsyen, u errëson sytë dhe i nis në drejtime që cenojnë pavarësinë e pushteteve tjera.
Duke i bërë shkelës të lirive dhe të drejtave të njeriut, se ka ende shumë më keq, prandaj dhe sot rreziku i udhëkryqit të mjegullt nuk është që ekzekutivi apo legjislativi të cenojë pavarësinë e gjyqësorit, por është që gjyqësori të gjymtojë pavarësinë e dy të tjerëve por aftësinë për të funksionuar. Kjo ka ndodhur në vende të tjera, nuk është diçka e panjohur në historinë e zhvillimeve të drejtësisë, pro kjo nuk mund të ndodhë në këtë vend. Ky vend nuk e ka luksin të frenohet dhe jo më të ribjerë aty ku ishte”, tha Rama.
