Ministri i Jashtëm i Iranit, Abbas Araghchi, deklaroi të dielën se “askush nuk e di” se kush do të jetë lideri i ardhshëm suprem i vendit, mes raportimeve se organi kompetent iranian ka zgjedhur pasardhësin e Ajatollah Ali Khamenei.
Duke folur në emisionin “Meet The Press” të NBC, Araghchi tha se ka shumë spekulime rreth kësaj çështjeje, por theksoi se duhet pritur mbledhja e Asamblesë së Ekspertëve, e cila do të votojë për liderin e ri suprem.
Asambleja përbëhet nga 88 klerikë të lartë dhe është institucioni që zgjedh liderin suprem të Iranit. Anëtarët e saj zgjidhen nga votuesit iranianë, por zakonisht konsiderohen figura besnike ndaj Khameneit.
Araghchi shtoi se deri në mbledhjen e këtij institucioni, një këshill i përkohshëm drejtues mban përgjegjësinë për udhëheqjen, ndërsa institucionet iraniane vazhdojnë të funksionojnë normalisht. Sipas disa vëzhguesve, një lider i ri nuk mund të zgjidhet derisa asambleja të mblidhet fizikisht për të marrë vendimin.
I pyetur edhe për deklaratat e presidentit amerikan Donald Trump, i cili tha se duhet të ketë rol në përzgjedhjen e liderit të ri iranian, Araghchi u përgjigj prerazi:
“Ne nuk lejojmë askënd të ndërhyjë në punët tona të brendshme. Kjo është një çështje që i takon popullit iranian,” tha ai, duke theksuar se vendimi për liderin suprem është “ekskluzivisht në dorën e popullit iranian”.
Ministri iranian përsëriti gjithashtu se Teherani nuk do të pranojë kurrë kërkesën e Trump për “dorëzim pa kushte”. Ai kujtoi se në qershor të vitit të kaluar Irani kishte pranuar një propozim për armëpushim, por këtë herë – sipas tij – duhet të ketë një fund përfundimtar të luftës.
“Askush nuk dëshiron që kjo luftë të vazhdojë,” tha Araghchi, duke shtuar se Irani do të vazhdojë të veprojë në kuadër të vetëmbrojtjes.
Ai këmbënguli gjithashtu se Irani nuk po sulmon vendet fqinje, por objektiva dhe infrastruktura amerikane të vendosura në shtetet arabe të Gjirit.
