Ministria për Europën dhe Punët e Jashtme përmes një postimi në “X” ka reaguar lidhur me sulmin e fundit me raketë balistike të Iranit në hapësirën ajrore të Turqisë. Në reagim ministria thekson se dënon sulmet e fundit ndaj Turqisë ndërsa shprehu solidaritet të plotë ndaj saj dhe aleatët e NATO-s.
“Republika Islamike e Iranit vijon të përshkallëzojë konfliktin, duke sulmuar jo vetëm fqinjët e saj në Lindjen e Mesme, por edhe duke vënë në shënjestër Turqinë.
Edhe një herë, NATO ka dëshmuar aftësinë e saj të jashtëzakonshme dhe reagimin e shpejtë në mbrojtje të Aleatëve dhe të sigurisë së tyre.
Shqipëria dënon fuqimisht sulmin e fundit me raketë balistike të regjimit iranian kundër Turqisë, një partner strategjik i Shqipërisë dhe Aleat i çmuar në NATO. Ne qëndrojmë në solidaritet të plotë me Turqinë dhe me të gjithë Aleatët në mbrojtje të territorit, sigurisë dhe unitetit të Aleancës”, shkruhet në reagim.
