Shtetet e Bashkuara të Amerikës do t’i intensifikojnë përsëri sulmet e tyre ndaj Iranit sot, tha Sekretari i Mbrojtjes Pete Hegseth. Ai u shpreh se SHBA-të janë “brenda planit” për objektivat e tyre në luftën me Iranin, por nuk specifikoi një afat kohor përfundimtar se kur mund t’i jepet fund.
“Edhe një herë, sot do të jetë dita me numrin më të lartë të sulmeve deri më tani, njësoj si dje”, tha sot Hegseth në një konferencë për mediat.
“Nuk do të donim të caktonim një afat kohor përfundimtar për fundin e luftës”, tha Hegseth, duke shtuar se rezultati përfundimtar do të përcaktohej nga Presidenti Donald Trump, por, “siç e kemi thënë, jemi sipas planit”.
Ai shtoi se Presidenti Trump nuk mund të toleronte që Irani t’i afrohej gjithnjë e më shumë kapaciteteve bërthamore.
“Një regjim si ky, që refuzon të heqë dorë nga ambiciet e tij bërthamore, nuk është vetëm një problem rajonal, është një kërcënim i drejtpërdrejtë për Amerikën, lirinë dhe qytetërimin”, theksoi Hegseth për Iranin.
Ai më pas shtoi se “bota, Lindja e Mesme, aleatët tanë mosmirënjohës në Evropë dhe madje edhe pjesë të shtypit tonë duhet t’i thonë një gjë Presidentit Trump – ‘faleminderit’”.
Sekretari i Mbrojtjes nuk e mohoi raportimin se Pentagoni i ka kërkuar Shtëpisë së Bardhë të miratojë një kërkesë financimi prej më shumë se 200 miliardë dollarësh drejtuar Kongresit për luftën e Iranit.
“Mendoj se ky numër mund të ndryshojë. Duhen para për të vrarë të këqijtë”, u tha Hegseth gazetarëve kur u pyet për kërkesën, e cila u raportua nga Washington Post.
