Irani ka vazhduar sulmet ndaj vendeve të Gjirit, duke përdorur dronë dhe raketa, në ditën e 22-të të luftës. Sipas raportimeve të media, Irani ka kërcënuar Emiratet e Bashkuara Arabe me sulme ndaj qytetit portual Ras al-Khaimah, nëse ishujt e saj të Gjirit vazhdojnë të sulmohen.
Një tjetër sulm i rëndësishëm ishte drejt bazës anglo-amerikane në Diego Garcia, ku Irani lëshoi dy raketa balistike. Në orët e para të së shtunës, ushtria izraelite raportoi se një tjetër valë raketash ishte lëshuar nga Irani drejt territorit të Izraelit, por mbrojtja ajrore e shtetit hebre i kishte kapur shumicën e predhave.
Ndërkohë, në terren, ushtria izraelite goditi objektiva të Hezbollahut në Bejrut dhe lëshoi paralajmërime për evakuimin e shtatë lagjeve në periferi të kryeqytetit libanez.
Në një zhvillim tjetër, administrata amerikane ka hequr përkohësisht sanksionet mbi naftën iraniane që ndodhet aktualisht në det të hapur. Ky autorizim afatshkurtër do të mundësojë që rreth 140 milionë fuçi naftë të hyjnë në tregjet globale, duke ndihmuar për të mbajtur çmimet e naftës më të ulëta.
