Një ngjarje që mund të kishte marrë përmasa tragjike është parandaluar në kohë nga Policia e Shtetit në Vlorë. Sipas raportimeve paraprake, shërbimet e policisë kanë marrë njoftim për një person të armatosur me thikë, i cili po kërcënonte anëtarët e familjes së tij.
Menjëherë pas sinjalizimit, forcat e policisë kanë ndërhyrë dhe kanë neutralizuar situatën, duke arrestuar autorin dhe duke shmangur çdo rrezik për jetën e familjarëve.
Bëhet fjalë për një 75-vjeçar, i cili dyshohet se kishte ushtruar dhunë dhe përbënte kërcënim të drejtpërdrejtë për bashkëshorten dhe të afërmit e tij.
Ndërhyrja e shpejtë e policisë ka parandaluar përshkallëzimin e situatës dhe ka evituar një incident me pasoja të rënda. Autoritetet po vijojnë hetimet për të zbardhur të gjitha rrethanat e ngjarjes, ndërsa materialet janë dorëzuar për veprime të mëtejshme ligjore.
