Koreja e Veriut ka lëshuar disa predha, mes tyre të paktën një raketë balistike me rreze të shkurtër, drejt zonës detare në perëndim të vendit, sipas ushtrisë së Koresë së Jugut.
Autoritetet ushtarake koreano-jugore bëjnë të ditur se lëshimet u kryen rreth orës 13:00 me orën lokale, nga një zonë pranë Çongxhusë në provincën veriore Pjongan. Sipas tyre, raketa përshkoi rreth 80 kilometra.
Ky është lëshimi i parë i njohur i një rakete nga Koreja e Veriut që prej 19 prillit, kur Pheniani testoi raketa balistike me rreze të shkurtër dhe pretendoi se ato ishin të pajisura me municione thërrmuese.
Analistët vlerësojnë se këto veprime tregojnë përpjekjet e Phenianit për të forcuar kapacitetet e tij ushtarake dhe për të demonstruar gatishmërinë për konflikte moderne. Ndërkohë, Seuli i ka bërë thirrje Koresë së Veriut të angazhohet në nisma për uljen e tensioneve dhe të përgjigjet ndaj përpjekjeve për paqe në rajon.
Ministria e Jashtme e Koresë së Jugut ka theksuar gjithashtu se do të vijojë të punojë me partnerët ndërkombëtarë për objektivin e çarmatimit bërthamor të gadishullit Korean.
