Artisti shkodran Adrian Paci, me anë të një postimi në faqen e tij faecbook ka reaguar në lidhje me vendimin e deputetes Marjana Koçeku, e cila sot ka njoftuar largimin e saj nga grupi parlamentar i PS.
Në postimin e tij Paci thekson se ky është një vendim kurajoz ku dhe duhet të ndiqet nga të tjerët për të hapur rrugë një pakti të ri, për një Shqipëri ndryshe.
Postimi i Pacit
Dorëheqja e Marjana Koçekut nga grupi parlamentar i PS asht një sinjal i fortë se pushteti nuk mundet me qenë qëllim në vetvete e se reflektimi, vetëpërmbajtja e tërheqja nuk duhen konsiderue si dobësi, por si bashkëudhetarë të detyrueshëm sidomos për ato të cilët vullneti i qytetarëve i ka mveshë me pushtet. Asht e qartë se sot kërkohet një pakt i ri mes shoqnisë dhe elitës politike e kjo nevojë e fton klasën drejtuese me ba një hap mbrapa. Rregulla të reja loje duhen hartue e këto rregulla duhet ta sanksionojnë qarkullimin e elitave si mekanizmin e domosdoshëm që gërsheton stabilitetin me nevojën e vazhdueshme për ndryshim. Të lumtë Marjana për vendimin tand kurajoz e uroj që shumë të tjerë ta ndjekin për me i hape rrugë një pakti të ri për një Shqipni ndryshe.
