Hetuesit belgë, të cilët prej disa ditësh, janë në Shqipëri pritet të marrin në pyetje të tjerë persona që kanë dijeni lidhur me 3,4 milionë eurot e konfiskuara në dosjen e “Toyota Yaris”. Për shumën e parave, deklarime do të japin dhe 6 të hetuarit në vitin 2018 ndërsa i dënuar për mosdeklarim të ardhurash është Ervis Vladi si pronar i shumës së parave.
Në të njëjtën dosje është dënuar me 2 vite burg edhe Agim Ceka pasi në servisin ku do të shkonte mjeti u gjet një armë pa leje. Pas zbulimit të shumës së eurove në vitin 2018, fillimisht të gjithë u hetuan për pastrim parash dhe grup i strukturuar kriminal, por Gjykata dënoi vetëm Vladin si pronar të vetëm të shumës së parave. Për shkak të gjykimit të shkurtuar, ai u dënua me një vit burg.
Për dosjen, prokurorët Belgë morën në pyetje dhe kryetarin e Partisë Demokratike. Lulzim Basha iu përgjigj hetuesve në Prokurorinë e Posaçme, por në dalje u tregua i rezervuar. Për disa orë, kryedemokrati Basha dha shpjegime para prokurorëve belgë të cilët kanë mbërritur në Tiranë, lidhur me çështjen e “Toyota Yaris”, automjet brenda të cilit u gjetën 3.4 milionë euro.
Që prej vitit 2018, autoritetet belge kanë bërë tre pyetje specifike kryedemokratit, se si e mori vesh informacionin, kush ia dha dhe nëse ka ndonjë të dhënë tjetër lidhur me këtë çështje. Në qershor të vitit 2018, nga foltorja e parlamentit Basha tha se një automjet me para të padeklaruara po vinte nga Belgjika drejt Shqipërisë. Për këtë deklaratë, hetuesit belgë sollën një letër-porosi për prokurorinë e Posaçme në të cilat kërkonin marrjen në pyetje te tij kjo edhe pasi deklaratat për mbërritjen e shumës së parave, u konfirmuan tre ditë më pas në portin e Durrësit, ku dhe u sekuestruan.
Autoritetet belge gjithashtu kërkuan të dinë nëse ekziston një dosje me dëshminë e Lulzim Bashës dhe nëse do t’i vendoset në dispozicion një kopje. Kjo pasi kreu i PD-së është pyetur edhe më parë në lidhje me ngjarjen nga Prokuroria e Tiranës në tetor të vitit 2018 por akuza arkivoi dosjen duke mos marrë asnjë vendim për të./ A2
