Kryetari i PD-së, Lulzim Basha u shpreh ditën e sotme në një konferencë për mediat se Edi Rama po i bën presion SPAK-ut për të mos goditur të përfshirët te koncesionet për inceneratorët. “Nuk është për të qarë, por për t’i marrë zvarrë. SPAK-ut i bëj thirrje të mos intimidohet nga presioni i Edi Ramës. Unë kam dijeni që SPAK-ut po i bëhet presion”.
Lideri i PD-së tha i bindur se të gjithë do të dalin përpara drejtësisë. “Nga ai që ka ngjyer gishtin deri te ai që ka tepsinë”. Kryedemokrati, pati një replikë të fortë edhe me gazetarin e Syri.net, që sipas tij ky televizion është kthyer në instrument lufte kundër PD-së për interes të një njeriu, referuar Sali Berishës, por theksoi se “mua nuk ma bën syri terr”.
Por kush i furnizoi demokratët me dosjen e inceneratorëve dhe provat që kanë nxjerrë kundër qeverisë? “Falënderoj një grup zyrtarësh që i kanë sjellë dokumentet” tha Tabaku. “Zyrtarë të përgjegjshëm kanë dhënë prova tronditëse për mënyrën si ka funksionuar” shtoi Dhurata Çupi.
Tabaku publikoi grafikun që tregon skemën korruptive të pagesave të inceneratorëve. Sipas saj, sot para syve të të gjithë shqiptarëve është fakt korrupsioni galopant dhe afera më e rëndë e këtyre 30 viteve.
/5pyetjet.al
