Me anë të një deklaratë mëngjesin e së shtunës, Presidenti i Ukrainës i është drejtuar popullit të tij me mesazhin e shpresës, se së shpejti ata do të kthehen në shtëpitë e tyre të parrezikuar.
“Jam i sigurt se së shpejti do të jemi në gjendje t’u themi njerëzve tanë: kthehuni! Kthimi nga Polonia, Rumania, Sllovakia dhe të gjitha vendet e tjera. Kthehuni, sepse nuk ka më kërcënim”, u shpreh ndër të tjera presidenti i Ukrainës.
Ndërkohë, këtë të shtunë është duke u zbatuar edhe armëpushimi i arritur mes palëve për evakuimin e civilëve nga zonat e luftës.
Në fjalim, Zelensky e ka kritikuar NATO-n dhe e ka quajtur ‘të dobët’, pas vendimit të saj që të mos caktonte një zonë ndalim-fluturimi mbi Ukrainë. “Duke filluar nga sot kushdo që vdes do të vdesë edhe për shkakun tuaj, për shkak të dobësisë suaj, për shkak të përçarjes suaj”, tha ai.
Zelenskyy pohoi gjithashtu se mungesa e një zone ndalim-fluturimi ka dhënë në mënyrë efektive “dritën jeshile për bombardimet e qyteteve dhe fshatrave të Ukrainës”.
Pas një takimi të ministrave të Jashtëm të NATO-s në Bruksel, më 4 mars, shefi i aleancës, Jens Stoltenberg, tha se avionët e saj nuk duhet të fluturojnë në hapësirën ajrore të Ukrainës gjatë konfliktit me Rusinë, pavarësisht thirrjeve të Kievit për të zbatuar një zonë ndalim-fluturimi mbi këtë vend.
Udhëheqësit perëndimorë, deri më tani, e kanë hedhur poshtë idenë, nga frika se kjo do të çonte në përshkallëzim më të madh të luftës.
Çfarë është zona e ndalim-fluturimit?
Zona e ndalim-fluturimit është një zonë e hapësirës ajrore – mbi një vend të tërë ose pjesë të tij – ku nuk lejohet të fluturojë asnjë aeroplan ose ndonjë objekt tjetër ajror, përveç atyre që kontrollojnë hapësirën ajrore.
Ajo zakonisht ndërmerret për t’i mbrojtur civilët në terren gjatë një lufte, si dhe për të lejuar dërgimin e sigurt të ndihmave humanitare.
