Çmimet e larta të naftës pritet të ndikojnë në shtrenjtimin e biletave për udhëtimet me aeroplanë, sipas shefit të kompanisë ajrore Delta, Ed Bastian.
Ai ka thënë për BBC, se ndikimi përfundimtar “varet nga çmimi i karburantit”.
Çmimet e karburanteve kanë arritur në nivelin më të lartë në 14 vitet e fundit, si pasojë e pushtimit rus të Ukrainës.
Emirates, Japan Airlines dhe AirAsia janë në mesin e kompanive që kanë thënë se do të rrisin çmimin e biletave.
Para pandemisë – më 2019 – 200 milionë persona kanë udhëtuar me Deltan, duke e bërë kompaninë e dytë më të madhe në botë për nga numri i pasagjerëve.
Bastian ka thënë se për fluturimet brenda Shteteve të Bashkuara, çmimi i biletave do të rritet për gati 25 dollarë dhe për fluturimet ndërkombëtare çmimi do të jetë pak më i lartë se aq.
Fluturimet ndërkombëtare përbëjnë 35 për qind të biznesit të kompanisë Delta.
Shumë kompani tentojnë të mbrojnë veten nga situata të tilla, duke siguruar karburant paraprakisht.
Easyjet dhe British Airways, kanë thënë se kanë siguruar karburantin për 60 për qind të nevojave të këtij viti.
