Kryeministri Albin Kurti, në një vjetorin e punës së qeverisë që udhëheq, tha se viti që lamë pas ishte vit i kthesës drejt ndryshimit.
Ai ka thënë se Qeveria iu përgjigj mirë të gjitha krizave në të cilat ‘navigoi përgjatë vitit’.
“Sot i tejkalojmë 600 vendime, proceduam 128 projektligje, sot i kalojmë edhe 130, më shumë se çdo qeveri paraprake në vitin e parë saj. Përgjatë vitit, kemi naviguar nëpër kriza botërore, që kanë testuar jo vetëm aftësinë tonë qeverisëse por edhe shoqërore. Së bashku kemi menaxhuar pandeminë me masa që kanë ruajtur shëndetin publik të qytetarëve por edhe shëndetin tonë të ekonomisë tonë publike dhe private. Kishim krizën e energjisë që ende nuk ka kaluar. Kemi marrë masa duke subvencionuar që të mos rëndohen ata që fitojnë më së paku. S’ka dyshim që problemet që kemi trashëguar janë të mëdha e sfidat përpara janë edhe më të mëdha por qytetarët na kanë besuar ne që ta bëjmë ndryshimin. Ky vit ishte vit i kthesës drejt ndryshimit”, ka thënë Kurti.
