Sekretari për Pushtetin Vendor në PD, Roland Bejko tregoi mbrëmë prapaskenat e mbledhjes që u zhvilluar në PD pas dorëheqjes së Lulzim Bashës. Bejko tha te “TPZ” se i ka drejtuar disa pyetje Bashës, por nuk ka marrë përgjigje për pyetjen më të rëndësishme, se a është kjo dorëheqje pa kthim.
Ai u shpreh se rezultatet e zgjedhjeve treguan se Basha nuk arriti që të bënte për vete elektoratin gri.
“Kur Basha lexoi deklaratën, pati njerëz të paqartë dhe kishin shumë pikëpyetje. Unë i bëra disa pyetje. I thashë, është dorëheqje me të drejtë kthimi apo pa kthim? E dyta kush do ta drejtojë partinë? Dhe e treta, a ka negociatë me palën tjetër?
Kam marrë përgjigje që partia do të drejtohet sipas statutit dhe ka thënë nuk ka asnjë marrëveshje me palën tjetër. Për pyetjen a do të ketë kthim, nuk u përgjigj.
Diskutimi im ka qenë i tillë, i kam thënë, në momente humbjesh zgjedhjesh, opinioni publik dhe zgjedhësit mezi presin të thuash fjalën e parë. Fjala e parë që dëgjova, ishte nuk kam humbur asnjë palë zgjedhje. Kjo më ka thyer shumë. Jam ndjerë i fyer.
Edhe për faktin që ne e filluam betejën, 4-5 vetë, pa kontaktuar me Bashën, vetëm me çfarë ndodhi në 9 shtator. I bëmë thirrje Bashës që nëse kishte gjë për Berishën, ta thoshte. Kaluan shumë muaj dhe Basha foli vetëm afër mbajtjes së Kuvendeve.
Në gjithë këtë histori jam i mërzitur shumë nga veprimet dhe mosveprimet e zotit Basha. Nëse kishte ndërmend ta bënte betejën e jetës së tij, kjo ishte beteja.
Te Big Brother ishte ajo zonja që i thoshte të birit nxirre luanin brenda. Edhe ne ia kërkuam Bashës. Mendova se elektorati gri do të mbeshteste Bashën. Elektorati gri ndenji në shtëpi”, tha Bejko.
