Kolegji i Posaçëm i Apelimit pasi dëgjoi argumentet e drejtueses së prokurorisë së Tiranës, Elizabeta Imeraj vendosi që të tërhiqet për të shqyrtuar dokumentet që prokurorja paraqiti për të dhënë vendimin në datë 12 Prill në orën 13:00. Imeraj kërkon ose lënien në fuqi të vendimit të shkallës së parë, që i dha “dritën jeshile” ose të riçelë hetimin dhe të marrë në konsideratë faktet e reja.
NJOFTIMI
Kolegji i Posaçëm i Apelimit zhvilloi sot, më datë 01.04.2021, ora 11:00, seancën gjyqësore publike të çështjes (JR) 42/2021, datë 27.07.2021, që i përket ankimit të Komisionerit Publik kundër vendimit nr. 363, datë 01.04.2021, të Komisionit të Pavarur të Kualifikimit që lidhet me subjektin e rivlerësimit Elizabeta Imeraj.
Komisioneri Publik iu përgjigj pyetjeve që subjekti i rivlerësimit dhe avokati i depozituan para përfundimit të seancës së djeshme gjyqësore që lidheshin me gjetjet e vëzhguesve ndërkombëtarë dhe kriterin e vlerësimit të pasurisë.
Subjekti i rivlerësimit, znj. Elizabeta Imeraj përmbylli prapësimet e saj për të trija kriteret e vlerësimit referuar shkaqeve të ankimit të Komisionerit Publik, duke i kërkuar Kolegjit:
– Riçeljen e hetimit duke marrë në cilësinë e provës aktet në fashikullin e depozituar në Kolegj, si dhe aktet e reja të referuara prej saj në mbështetje të pretendimeve të ngritura.
– T’i drejtohet institucioneve përkatëse për marrjen e informacioneve shtesë të nevojshme, si dhe thirrjen e dëshmitarëve, në kuadër të një hetimi të plotë dhe të thelluar.
– Lënien në fuqi të vendimit nr. 363, datë 01.04.2021, të Komisionit të Pavarur të Kualifikimit.
Pasi dëgjoi parashtrimet e palëve, trupi gjykues u tërhoq për t’u konsultuar lidhur me kërkesat e paraqitura nga subjekti i rivlerësimit, për të cilat do të shprehet në seancën e radhës, që do të zhvillohet më datë 12.04.2022, ora 13:00.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.
