Sot në Serbi po zhvillohen zgjedhjet presidenciale, zgjedhjet e parakohshme parlamentare dhe zgjedhjet lokale. Janë rreth 6 milionë e gjysmë të serbëve që do të kenë mundësi të votojnë.
Duke qenë se qeveria e Kosovës nuk lejoi votimin brenda territorit të saj, mëngjesin e sotëm serbët e veriut po nisen drejt Serbisë me transport të organizuar por nga disa komuna ata do të udhëtojnë edhe me automjetet e tyre.
Mbrëmë u raportua se në Shillovë të Gjilanit grupe serbësh pritën në radhë për t’u furnizuar me naftë për të shkuar dhe votuar në Serbi.
Në këto zgjedhje të Serbisë, shqiptarët e Preshevës, Medvegjës dhe Bujanocit garojnë me dy lista dhe pretendojnë të kenë tre deri në katër deputetë.
