Trajneri holandez, Louis Van Gaal ka zbuluar mbrëmjen e djeshme se vuan nga një formë agresive e kancerit, megjithatë nuk u ka treguar asnjëherë futbollistëve për këtë problem.
Duke folur në një emision televiziv në RTL Humberto, tekniku 70-vjeçar ka vijuar rrëfimin e tij, duke thënë se bëhet fjalë për një kancer në prostatë dhe për këtë u është nënshtruar 25 herë terapive.
“Prej disa kohësh vuaj nga një formë agresive e kancerit të prostatës dhe për këtë kam bërë më shumë se 25 seanca kimio-terapie”, ka thënë Van Gaal
“Futbollistëve të mi nuk u kam treguar asgjë, megjithatë pavarësisht të gjithave, dua të jem me çdo kusht në Katar 2022”, shtoi ai.
“Kam pasur trajtim preferencial në spital. Më lejuan të hyja nga dera e pasme kur shkova në një takim dhe më shtynë menjëherë në një dhomë tjetër. Jam trajtuar mrekullisht”, ka thënë mes tjerash Van Gaal.
Van Gaal është në detyrën e tij të tretë në krye të ekipit kombëtar te Holanda, pasi e udhëhoqi skuadrën në vendin e tretë në Kupën e Botës në vitin 2014 përpara se të bashkohej me Manchester United.
Holandezët u shortuan në Grupin A të Kupës së Botës të këtij viti, së bashku me nikoqirët Katarin, Ekuadorin dhe Senegalin.
